ភ្នំពេញ៖បឹងលំកុដជាបឹងធម្មជាតិដ៏ស្រស់ត្រកាលព័ទ្ធជុំវិញដោយព្រៃព្រឹក្សាលតាវល្លិ៍ មានទេសភាពបៃតងខ្ចី ស្ថិតនៅក្នុងឃុំសេដា ស្រុកលំផាត់ ខេត្តរតនគិរី។ ផ្ទៃបឹងលំកុដមានទំហំ ២៥ ហិកតាហើយមានជម្រៅរហូតដល់ជាង៧០ម៉ែត្រនិងមានទឹកថ្លាយង់។បឹងលំកុដរួមនឹងតំបន់ជុំវិញមានទំហំជាង ១១០ ហិកតា ត្រូវបានរាជរដ្ឋាភិបាល ប្រកាសដាក់ជាតំបន់ការពារទេសភាពកាលពីថ្ងៃទី២៥ ខែធ្នូ ឆ្នាំ ២០១៨។បឹងនេះមានប្រវត្តិយូរលុងមកហើយថា អ្នកតាដែលថែរក្សានៅតំបន់នេះគឺមានឈ្មោះ គិរីវង្កុដ។
លោកសឿនខេមរៈអនុប្រធានមន្ទីរបរិស្ថានខេត្តរតនគិរីបានឱ្យដឹងនៅថ្ងៃនេះថាតាំពីរដ្ឋាភិបាលបានប្រកាសដាក់បឹងលំកុដជាតំបន់ការពារទេភាពកាលពីចុងឆ្នាំ២០១៨មកគឺយើងបានបោះបង្គោលព្រំដីការពារយ៉ាងច្បាស់លាស់។ការពារបាននូវព្រៃឈើសត្វព្រៃនិងជីវចម្រុះហើយមិនមានអ្នកចូលទៅរំលោភយកដីមកកាន់កាប់ឡើយ។រក្សាបាននូវទេសភាពយ៉ាងស្រស់ត្រកាលគួរអោយចង់ទស្សនាកម្សាន្ត។
លោកអនុប្រធានបានលើកឡើងនូវកំណរកំណើតបឹងនេះកើតឡើងពីការបំផ្ទុះភ្នំភ្លើងតាំងពីដំណាលគ្នាទៅនឹងបឹងយក្សលោម។នៅក្នុងក្របខណ្ឌនៃដំណើរចុះត្រួតពិនិត្យការងារគ្រប់គ្រងនិងអភិរក្សធនធានធម្មជាតនៅខេត្តរតនគិរី។កាលពីពេលថ្មីៗនេះលោកសាយសំអាល់រដ្ឋមន្ត្រីក្រសួងបរិស្ថានរួមនឹងថ្នាក់ដឹកនាំខេត្តរតនគិរីនិងប្រតិភូបានធ្វើទស្សនកិច្ចនៅតំបន់ការពារទេសភាពបឹងលំកុដដែលជាជាបឹងធម្មជាតិដ៏ស្រស់ត្រកាលព័ទ្ធជុំវិញដោយព្រៃព្រឹក្សាលតាវល្លិ៍មានទេសភាពបៃតងខ្ចីស្ថិតនៅក្នុងឃុំសេដាស្រុកលំផាត់ខេត្តរតនគិរី។
លោករដ្ឋមន្ត្រីបានវាយតម្លៃថាបឹងលំកុដនេះមានទេសភាពស្អាតស្រទន់គ្របដណ្តប់ដោយសមុទ្រព្រៃទាំងទឹកក្នុងបឹងក៏ដូចទេសភាពព្រៃគឺមានពណ៌បៃតងគួរគយគន់និងផ្តល់នូវផាសុខភាពស្ទើរតែឃើញហើយចង់មកទីនេះម្តងទៀតមិនចេះឆ្អែត។នេះជាជង្រុកអេកូទេសចរណ៍មួយអាចទាញមន្តស្នេហ៍ភ្ញៀវអោយមកកំសាន្តកុំអោយខានឱ្យសោះ៕
