(ព្រះសីហនុ)៖ កាលពីរសៀលថ្ងៃទី៣ ខែសីហា ឆ្នាំ២០២១ សពមេធាវី ជូ ជាគុយ ដែលបានបាត់ខ្លួននៅឆ្នេរអូរត្រេះ ពេលចុះងូតទឹកលេងជាមួយមិត្តភក្តិ ហើយត្រូវបាន សមត្ថកិច្ចសហការគ្នាស្វែងរកពេញមួយយប់នោះ នៅពេលនេះបានរកឃើញហើយ ដោយសាកសពបានអណ្តែតមកទើរលើឆ្នេរ ចម្ងាយប្រមាណជាង ១គីឡូម៉ែត្រពីកន្លែងបាត់។
លោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីហនុ បានប្រាប់បណ្តាញ
ព័ត៌មានថា សពជនរងគ្រោះបានរកឃើញនៅវេលម៉ោង ៥៖៣០នាទីព្រឹកថ្ងៃទី៤ ខែសីហា ឆ្នាំ២០២១នេះ ដោយបានអណ្តែតទើរលើឆ្នេរខ្សាច់ ចំងាយប្រហែល១០០ម៉ែត្រ ពីសំណង់ផែថ្មកណ្តាលឆ្នេរអូត្រេះ និងមានចំងាយប្រហែល១.៣០០ម៉ែត្រពីកន្លែងបាត់ខ្លួន។
បើតាមលោកឧត្តមសេនីយ៍ស្នងការ បច្ចុប្បន្នសាកសពត្រូវបានក្រុមគ្រួសារសាច់ញាតិ លើកដាក់លើគោក រង់ចាំពេទ្យយកសំណាក និងសមត្ថកិច្ចធ្វើកោស្យវិនិច្ឆ័យ។
សូមបញ្ជាក់ថា ជនរងគ្រោះ ជូ ជាគុយ អាយុ២៩ឆ្នាំ រស់នៅភ្នំពេញ និងមានមុខរបរជាមេធាវី បានលង់ទឹកសមុទ្របាត់ខ្លួននៅឆ្នេរអូរត្រេះ ខេត្តព្រះសីហនុ ខណៈកំពុងងូតទឹក ជាមួយមិត្តភក្តិមួយក្រុម ហើយក៏ត្រូវរលកបោកបក់យកទៅបាត់ នៅរសៀលថ្ងៃទី៣ ខែសីហា ឆ្នាំ២០២១នេះ។ កម្លាំងសមត្ថកិច្ច និងអ្នកមុជទឹកជំនាញ តាមស្វែងរកជនរងគ្រោះ ដែលបានបាត់ខ្លួន ប៉ុន្តែភ្លាមៗនោះនៅមិនទាន់រកឃើញនោះទេ ទើបនៅតែព្រឹកទៀបភ្លឺ សាកសពបានអណ្តែតមកទើរលើឆ្នេរតែម្តង៕
