• អភិបាលក្រុងកំពង់ផែ Mariupol នៃប្រទេសអ៊ុយក្រែន ថ្លែងថា ជនស៊ីវិលដែលកំពុងលាក់ខ្លួននៅក្នុងរោងចក្រផលិតដែកថែបដ៏ធំមួយ កំពុងខ្វះស្បៀងអាហារ ទឹក និងថ្នាំសង្កូវ។ លោក Vadym Boichenko ថា ស្ថានភាពនៅរោងចក្រដែកថែប Avozstal ពិតជាយ៉ាប់យ៉ឺន។ រោងចក្រដែកថែបនេះ ជាទីតាំងចុងក្រោយមួយដែលទាហានអ៊ុយក្រែនកំពុងគ្រប់គ្រង នៅក្នុងទីក្រុង Mariupol ហើយទាហានទាំងនេះកំពុងស្ថិតនៅជាមួយជនស៊ីវិល។
• ប្រធានធនាគារកណ្តលរបស់រុស្ស៊ី ថ្លែងថា ទស្សនវិស័យនៃសេដ្ឋកិច្ចរបស់រុស្ស៊ី គឺ«មិនប្រាកដប្រជាខ្លាំង» ស្របពេលដែលសេដ្ឋកិច្ចរុស្ស៊ីត្រូវបានសន្និដ្ឋានថានឹងថយចុះដល់ទៅ ១០ ភាគរយ នៅឆ្នាំនេះ។ ទណ្ឌកម្មអន្តរជាតិ និងតម្រូវការអ្នកប្រើប្រាស់ទាប កំពុងប៉ះពាល់ដល់សេដ្ឋកិច្ចរុស្ស៊ី ស្របពេលដែលអតិផរណាកើនឡើង។
• ប្រធានាធិបតីឥណ្ឌូណេស៊ីលោក Joko Widodo ថ្លែងថា ទាំងប្រធានាធិបតីអ៊ុយក្រែនលោក Volodymyr Zelenskyy និងប្រធានាធិបតីរុស្ស៊ីលោក Vladimir Putin នឹងចូលរួមកិច្ចប្រជុំកំពូល G-20 ដែលនឹងប្រារព្ធធ្វើឡើងនៅកោះ Bali ប្រទេសឥណ្ឌូណេស៊ី នៅខែវិច្ឆិកាខាងមុខនេះ។
• រុស្ស៊ីបានបញ្ជាក់នៅថ្ងៃសុក្រថា ខ្លួនបានវាយប្រហារលើទីក្រុងកៀវតាមអាកាស នៅក្នុងអំឡុងទស្សនកិច្ចរបស់អគ្គលេខាធិការអង្គការសហប្រជាជាតិ។
• វិទ្យុអឺរ៉ុបសេរី/វិទ្យុសេរីភាព បានឲ្យដឹងថា អ្នកស្រី Vera Gyrych ផលិតករប្រចាំវិទ្យុអឺរ៉ុបសេរី/វិទ្យុសេរីភាពដែលទទួលមូលនិធិគាំទ្រដោយរដ្ឋាភិបាលអាមេរិក បានស្លាប់ នៅពេលដែលគ្រាប់មីស៊ីលរបស់រុស្ស៊ីបានបាញ់ចំអគារដែលអ្នកស្រីបានរស់នៅក្នុងទីក្រុងកៀវ។
• ប្រធានាធិបតីអ៊ុយក្រែនលោក Volodymyr Zelenskyy បានថ្លែងថា ការវាយប្រហាររបស់ទាហានរុស្ស៊ីលើទីក្រុងកៀវ ភ្លាមៗបន្ទាប់ពីលោកបានជួបពិភាក្សាជាមួយអគ្គលេខាធិការអង្គការសហប្រជាជាតិលោក Antonio Guterres ជាគោលបំណងរបស់រុស្ស៊ី «ដើម្បីមាក់ងាយលើអង្គការសហប្រជាជាតិ និងអ្វីៗគ្រប់យ៉ាងដែលអង្គការនេះតំណាងឲ្យ»។
• ប្រទេសអាល្លឺម៉ង់ បានថ្កោលទោសការវាយប្រហារ «ដ៏អមនុស្សធម៌» ដែលបង្ហាញឲ្យឃើញថា ប្រធានាធិបតីរុស្ស៊ីលោក Vladmir Putin «គ្មានសេចក្តីគោរពអ្វីទាល់តែសោះដល់ច្បាប់អន្តរជាតិ»។
• សហរដ្ឋអាមេរិកមិនជឿថា នឹងមានគ្រោះថ្នាក់ពីប្រទេសរុស្ស៊ីតាមរយៈការប្រើប្រាស់អាវុធនុយក្លេអ៊ែរនោះទេ បើទោះបីជាមានភាពតានតឹងនាពេលថ្មីៗនេះតាមរយៈសេចក្តីថ្លែងការណ៍នានារបស់រដ្ឋាភិបាលរុស្ស៊ីក៏ដោយ។ នេះបើតាមការបញ្ជាក់របស់មន្ត្រីការពារជាតិសហរដ្ឋអាមេរិកម្នាក់ នៅថ្ងែសុក្រនេះ ហើយដែលត្រូវបានរាយការណ៍ដោយទីភ្នាក់ងារព័ត៌មាន Reuters។
• រដ្ឋាភិបាលអេស្ប៉ាញបានឲ្យដឹងនៅថ្ងៃសុក្រនេះថា មកទល់ពេលនេះ ការដឹកសម្ភារៈយោធាដ៏ធំបំផុតមួយរបស់ខ្លួនទៅកាន់ប្រទេសអ៊ុយក្រែន គឺដំណើរការទៅមុខដូចការរំពឹងទុក បន្ទាប់ពីកប៉ាល់ដឹកសម្ភារៈដែលមានទម្ងន់ជាង ២០០ តោន បានសំចតនៅកំពង់ផែមួយក្នុងប្រទេសប៉ូឡូញ។
• កងទ័ពរាប់ពាន់នាក់របស់អង្គការអូតង់ និងបណ្តាប្រទេសប្រចាំតំបន់អាត្លង់ទិកខាងជើង នឹងចូលរួមធ្វើសមយុទ្ធយោធានានា នៅទូទាំងទ្វីបអឺរ៉ុប នាប៉ុន្មានសប្តាហ៍ខាងមុខនេះ ស្របពេលដែលប្រទេសលោកខាងលិចព្យាយាមបំបាក់សកម្មភាពគឃ្លើនរបស់រុស្ស៊ី។/ ប្រភពៈVOA
